غريب شوية العنوان صح؟ أصل دا أكثر شيء موجود في مصر “الردح”، ولمن يتابعني من خارج مصر فكلمة “الردح” هو من نوع من السباب والسخرية المتبادل بطريقة سوقية وفي العادة كان يوجد في أقل المستويات في مصر ثقافة وتحضر، لكن حالياً تجد أن الردح انتقل لطبقات المثقفين وأستاذة الجامعات ومهندسين وأطباء وغيرهم. قرر كل الشعب لا إرادياً أو إرادياً أن ينضم لهم ويصبح مثل الرداحين سوقي وغوغائي. لا تصدقني، حسناً فلتتابع معي بعض الردح في مصر.
1
طرف أول: الكهرباء عمالة تقطع ياض، وكل شوية طابور بنزين، فاكر لما كانوا بيستعبطوك ويقولوا لك بتتصدر لغزة، يلا هز ديلك.
طرف ثاني: لا يا راجل طيب سيبك حد تاني يتكلم، فاكر لما مرسي قالك الكهرباء بتقطع عشان الواد أخد 20 جنية فنزل السكينة، والمحطات عمالة توزع البنزين في جراكن والراجل شافهم واتصل بيه عالتليفون، ووقتها صدقته وقولت مؤامرة لاسقاط مرسي. يلا يا خروووف.
2
طرف أول: ما بلاش يا بيادة ياللي السيسي لعب بيك الكورة وقالك مش هترشح وأقسم بالله أقسم بالله إننا ما عندنا مطمع في السلطة، وأهو ضحك عليك واترشح وقال ايه عشان الشعب ضحك عليه، شوفت إنك حمار وبيادة للعسكر.
طرف ثاني: هو مين اللي بيتكلم، بتاع الإخوان اللي قالوا مش هنرشح حد ورشحوا إثنين، وقالوا أصل الظروف اتغيرت، وقعدت تبرر لهم، فحد تاني يعترض على تغيير الكلام.
3
طرف أول: سيسك عمال يقول مصر وعظيمه وبكره تشوفوا مصر، ومصر تقبض على واحد ليبي يروحوا خاطفين مصريين عندهم وسيب وأنا سيب، لا كرامة رائعة في عهد السيسي، وطبعاً إنتا هتسكت وتحط البيادة في بقك وفوق دماغك وتعمل نفسك مش شايف.
طرف ثاني: معلش معلش أصل سامحني أصل ذاكرتي واقفة على الصحفية شيماء اللي السودان قبضت عليها ولبستها تهمة ومرسي عمل فيلم إنه رجعها، والمقابل العفو عن 140 سوداني مقبوض عليه في مصر. هما حلقوا له الفروة يا خروف ولا لسه.
4
طرف أول: السيسي وإبراهيم زي سيدنا موسى وهارون، وليه زي ما يقول هما موسى وهارون بقى، واحنا خوارج ويجب قتلنا زي ما مفتى الفتنة بيقول. وكنتم بتتهمونا احنا اننا بنستغل الدين. بس أقول ايه ما العبد هيفضل عبد ومش هيتكلم.
طرف ثاني: طيب يا أخي هو قال زي موسي وهارون، واحد تاني طلعوا قالوا “مؤيد من الله في كل قراراته” يعني اللي يعترض على قراره يبقي بيعترض على قرار الله مأيده. وموسى وهارون زي مثال مرسي وسيدنا يوسف. بيتك من إزاز ميحدفش الناس بالطوب
5
طرف أول: دايرين عاملين حفلة شحاته يا معفنين في الخليج، وكل شوية بلد تديكم قرشين، شحاتين نقول ايه معندكمش كرامة، ولا صحيح هما العبيد ليهم كرامة.
طرف ثاني: عالأقل احنا بناخد فلوس وعارفين إنها عشان اتخلصنا منكم ودي هديتنا، الدور والباقي اللي فضلت قطر تديهم فلوس ومش معروف السبب، والحداية مبتحدفش كتاكيت.
6
طرف أول: سيسك الخاين عمال يشكر في أسيادة في السعودية والإمارات وناقص يبوس لهم الجزم، ورئيسك المعين عمال يقابل رجال أعمالهم ويدلعهم، وناقص يجيب لهم شوية مصريين عبيد، بفلوسهم بقى يعملوا ما بدى لهم.
طرف ثاني: فين يدلعهم دا، دا مرسيك الخروف مجرد القطرين إدولهم قرشين، راح لاغي قرار من أيام السادات واللي بيقول سيناء لا يملك فيها سوى المصريين، وخلى القرار مصريين وقطريين وأتراك. اشتروك بفلوسهم
7
طرف أول: طيب يا بياده، السيسي عمل أهو زي مرسي وكذب والكهرباء بتقطع وكرامة مفيش وأسعار زفت وو، قولي كده نزلت كام مليونية ضد السيسي لنفس الأسباب بتاعة مرسي. طبعاً مفيش عشان محطوش لك البردعة وساقوك للإتحادية
طرف ثاني: عدد مظاهراتي اللي نزلتها ضد السيسي هو نفس عدد مظاهرتك إللي إنتا نزلتها ضد مرسي، لو إنتا شايف الحاجات اللي السيسي قلد فيها مرسي وحشة وتستاهل مظاهرة، طيب إنتا منزلتش ليه ضد مرسي لما عملها؟ قولي صحيح البرسيم كفاية ولا أزود لك شوية
أنا ممكن أفضل كده للصبح، الكلام اللي فوق دا هو حوارات في الفيس بوك واستيت لناس كثير، وتغريدات في تويتر ووو، بس كفاية كده، عندي ليك سؤال بقى ” هى مصر بعد وصلات الردح والشتيمة دي بقت أحسن؟” أممممم لا متحسنتش… “خلاص خلاص يا عم سيبك من مصر وتبقى أحسن، إنتا مبسوط ومرتاح نفسياً من اللي قاله لك” أه انا شمته بس ابن الـ … دا المرة القادمة هقوله كذا وكذا”…. “طيب خلاص مش مهم مصر ومش مهم إنك ارتاحت، يا ترى حتى شايف المجتمع لما يفضل نصه يقول لبعض كده هيبقى أكثر ترابطاً وأحسن وهيتقدم؟” لا مش بالظبط، بس يعني عاوزه يقولي كده وأسكت له… ” اه صح عندك حق متسكتش له، اشتمه وطلع عين أهله، بس هو صحيح ايه التغيير اللي حصل في النظام أو في الاخوان من الكلام دا لما اتقال؟ مرسي رجع أو كل الإخوان انتهوا” لا مرسي مرجعش ولسه الاخوان فالبلد.
أمممم يعني الكلام دا لم يجعل مصر أحسن، ومغيرش البلد، مبقتش مرتاح نفسياً، وزاد الانقسام… ورغم كده إنتا عمال تواصل وتقوله وتعيده، بص بص بص هقولك شيء.
أقفل يلا موقعي دا، مصمص شفايفك شوية، خش عالفيس أو تويتر، واكتب واشتم وإردح، مش هتغير شيء، ومش هتحسن الوضع وكمان هتزود كراهية الآخر لك، بس هتبقى ردحت وخلاص، يلا كمل استمر استمر
احلي حاجة عجبتني بعد المستفاد من النقال مقوله: قوليزصحيح البرسيم كفايه ولا أزود لك شويه