إسقاط مرسي ونظرية البطاطس

في عام 1845 بدأت المجاعة الكبرى في أيرلندا والتي استمرت 7 أعوام وتسببت في وفاة مليون شخص، وتعد هذه المجاعة هى أحد الأسباب التاريخية وراء العداء بين الأيرلنديين والإنجليز، أما سبب هذه المجاعة فيعود إلى “البطاطس”، نعم لقد كانت البطاطس هى الغذاء الرئيسي للشعب الأيرلندي وعندما أصابت بوباء جاع الشعب. البطاطس تعتبر الغذاء الذي لا يختلف على حبه إثنان، فهى رخيصة الثمن، جميلة الطعم، متوفرة طوال العام، وتجهز بعشرات الطرق، أي لا نرى فيها أي عيوب. وهذا ما يحدث في مصر حالياً وهو أننا نرى جميعاً نطبق نظرية “بطاطس” السياسية

توقفت شهر ونصف عن الكتابة وظللت في هذه الفترة أراقب من حولي وأراءهم السياسية والاقتصادية وغيرها، أحياناً راقبت من بعيد وأحياناً أخرى تعتمدت التعليق واستفزازهم لاستخراج ما يخفونه خلف قناع الدبلوماسية، وكانت النتيجة أن كل الأطراف مؤمنة بنظرية البطاطس بما فيهم أنا شخصياً وهى أن الأمر الذي نؤيده جميل ولذيذ وهو الخير كل الخير ولا يوجد به أي عيوب، واسمحوا لي استعرض تأثير البطاطس على الثلاثي “مؤيد ومعارض ومحايد” ونبدأ من أقصى اليسار وهو المعارض.

---

المعارض:

أنا: حضرتك معارض لمرسي؟

المعارض: أيوان أنا معارض لمرسي على طول الخط.

أنا: عندك حق عشان المؤشرات الاقتصادية بتقول في تراجع وزيادة أقساط الدين المحلي في الموازنة القادمة زادت 21% والأجنبي زاد 21% فدا معناه إن حنفية الديون اتفتحت زيادة علينا وعلى أولادنا.

المعارض: هاه إيه يا ابني اللي بتقوله دا مش فاهم حاجة منك، أنا عاوز أشيل مرسي عشان هو #$%$#%& بس خلاص.

أنا: اااه تقصد عشان تضليله البسطاء بأرقام كاذبة زي زيادة 30% في القمح وتطلع بعد كده وزارة التموين تقول في تراجع في القمح عندنا.

المعارض: بجد هو القمح طلع كذبة هو كمان، تصدق أول مرة أعرف الكلام دا.

أنا: هو حضرتك مش بتابع مؤشرات اقتصادية ولا اجتماعية ولا أرقام أمال إنتا زعلان من مرسي ليه وعاوز تسقطه.

المعارض: هو كده أصلاً عشان هو راجل …. ولازم يمشي، هو أنتا مش معارض ليه زيي. دا كفاية مراته اللي بتجيب هدوم من باريس.

أنا: يا سيدي دي أكاذيب وملناش دعوة بالحاجة مراته، في مليون حقيقة بتحصل نشتغل عليها وهى كفاية مش لازم نكذب عالراجل وأهله.

المعارض: بقولك إيه نكذب منكذبش بس هو يغور ويمشي هو وجماعته اللي في البيت واللي في المقطم.

أنا: طيب يا باشا وبعد ما يغور ويمشي إيه الخطوة التالية؟

المعارض: بسم الله الرحمن الرحيم، 1 يتولى رئيس المحكمة الدستورية البلاد بشكل مؤقت، 2 يتولى الجيش كل ما يخص بالأمن الداخلي والخارجي، 3 يتم تشكيل لجنة لتعديل الدستور المعيب، 4 إجراء انتخابات رئاسية بعد الدستور ما يتعدل، 5 يتم …

أنا: حيلك حيلك يا عم أنا مليش في الكلام المكتوب دا، خلينا واقعيين هو ممكن يحصل؟ واللجنة دي إزاي نضمن إن محدش هيعترض عليها؟ هننتخبها مثلاً ولا هنعمل إيه، طيب أفرض مثلاً بعد كل دا هوب الأخوان والسلفيين والجماعة الإسلامية والوسط رشحوا مرسي للإنتخابات القادمة نعمل إيه.

المعارض: هاه! يرشحوا مرسي تاني ليه وإزاي أصلاً وإحنا شلناه.

أنا: يا سيدي هو مش مرسي مواطن مصري وغير مدان في أي جريمة تمس الشرف يبقي حقه يترشح تاني خاصة إن الدستور قال فترتين رئاسيتين وهو أخد فترة واحدة وبس.

المعارض: هاه! نعم! مش مهم يترشح وهيخسر.

أنا: طيب لو الثوار والمعارضين اتفتتوا بين 4-5 مرشحين تاني وراح هوب مرسي كسب بنفس السيناريو تاني إيه الحل؟

المعارض: لالا خلاص هما اتعلموا الدرس ومش هيكرروا الغلطة دي تاني.

أنا: يا راجل عيني في عينك كده. يعني هتعرف تخلي أبو الفتوح وحمدين وعمرو موسي والبرادعي ووو كلهم يتفقوا على مرشح واحد؟ يقفوا قدام مرسي وشفيق.

المعارض: شفيق إيه كمان يا عم.

أنا: إيه يا سيدي مهو اللي ينطبق على مرسي بينطبق على شفيق وهو كمان لم يصدر ضده حكم ويقدر يترشح ووقتها يسحب أصوات العسكريين والفلول وغيرهم، ومرسي ياخد اصوات الإسلاميين وأصوات المعارضين تتفتت بين 3 مرشحين، فالأعادة تكون مرسي وشفيق و.

المعارض: نعم! مين! تاني. لالا إحنا هنخلي اللجنة اللي هتعدل الدستور تقول مرسي وشفيق ميترشحوش ونخلص.

أنا: طيب ما مرسي ممكن يرشح الكتاتني بدالة، وشفيق يرشح أي جنرال سابق برضك ويتلمع بسرعة ويبقى الإعادة بينهم برضك، إيه الحل.

المعارض: بص بقى متوجعش دماغ أهلى، هنشيل مرسي وبعد كده نشوف هنعمل إيه، وهو دا الصح والبلد مش هتتظبط غير كده.

أنا: يا عمي هتتظبط إزاي ما احنا شوفنا أهو إننا ممكن نكون بنضحك على نفسنا ومفيش شيء يتغير.

المعارض: هتتظبط بس وبطل إنتا فلسفة وأقعد ساكت، وأنا مش مكمل معاك الكلام، سلام يا عم. 

---

الخلاصة:

المعارض باصص تحت رجلية وشايف المشكلة، وشايف إن الحل بالشيل هو الصح، شايف بطاطس يعني طعمها حلو ومفيش أي عيب فيها، وأكيد كل شيء هيبقى جميل وزي الفل، جميل ليه وفين وإزاي وهيحصل إيه معرفش، بطاطس حلوه وجميلة وينسى خالص إنها رغم جمالها فهى ضعيفة أمام الآفات وممكن تسبب مجاعة تاني ودمار.